Toǵyz joldyń torabynda ornalasqan Petropavl qalasy Reseıdiń shekaralas aımaqtarymen iri seriktes ortalyq bolyp sanalady. Bıyl Ońtústik Oral temirjoly arqyly 791 myń tonna júk, 700 myńdaı jolaýshy tasymaldanǵan. Jyl ótken saıyn bul kórsetkishter artyp keledi. Sońǵy bes jylda birikken kásiporyndar sany 152-ge jetken.
«Sońǵy eki jyl ishinde kóliktik ınfraqurylymdy damytýǵa ınvestısııa úsh ese artyq salynyp, 80 mıllıard teńgeni qurap otyr. Reseı shekarasyna deıingi joldar qalpyna keltirilýde», dedi Q.Aqsaqalov.
Reseılik meıman óz sózinde Petropavl temirjol bólimshesiniń kólik-logıstıkalyq ınfraqurylymdyq mańyzyna toqtalyp, 2018-2019 jyldar aralyǵynda aýqymdy jańǵyrtý sharalary júrgiziletinin, jobanyń ázirlenip, qarajattyń bólingenin jetkizdi. Osylaısha júrginshilerge sapaly qyzmet kórsetýdiń barlyq múmkindikteri jasalatyn bolady.
Joba boıynsha ǵımarattardyń ishi-syrty zaman talabyna sáıkestendirilip, eskalatorlar ornatylyp, múgedek jandar úshin de qolaıly jaǵdaılar týdyrylady. Qoǵamdyq kólikter, aıaldamalar vokzalǵa jaqyndatylyp, alańdar abattandyrylady. Zańdy túrde qyzmet isteıtinder úshin arnaıy oryndar ashylady.
Sóz arasynda Petropavl temirjol qurylymy «Reseı temirjol» AAQ Ońtústik Oral fılıalyna qaraıtynyn aıta ketken jón.
О́mir Esqalı,
«Egemen Qazaqstan».
Soltústik Qazaqstan oblysy
